Azərbaycan, Bakı, 12 avqust /Trend, müxbir Q.Vəliyev/
Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsi Mehdiabad qəsəbəsində mərkəzləşdirilmiş monitorinq şəbəkəsinin məntəqəsinin yaradılmasına başlayıb. Bu barədə Trend-ə Dövlət Radiotezliklər İdarəsinin baş mühəndisi İlham Əfəndiyev deyib.
Əfəndiyevin sözlərinə görə, Mehdiabad qəsəbəsində idarəetmə mərkəzi də yerləşəcək. Oxşar mərkəzlər Yeni Günəşli qəsəbəsində və Gəncə şəhərində də açılacaq.
"Gəncə məntəqəsinin tikintisi üçün artıq ərazi ayrılıb, Yeni Günəşlidə fəaliyyət göstərəcək mərkəzdə isə təmir işləri aparılır. Radiomonitorinq sisteminin yaradılmasında başlıca məsələlərdən biri onun maliyyələşmə məsələsidir. Texniki parametrlər və monitorinq şəbəkəsinin yaradılmasına tələb olunan investisiyaları əks etdirən şərtlər layihədə maraqlı olan şirkətlər tərəfindən hazırlanıb və baxılmaq üçün nazirliyə təqdim edilib", - Əfəndiyev qeyd edib.
Layihədə iştiraka "PLATH GmbH", "Rhode&Schwarz" (Almaniya), "Aero System" (Kanada), "Tadiran" (İsrail) və "Aselsan" (Тürkiyə) şirkətləri maraq göstərib.
Əfəndiyevin sözlərinə görə, hazırda Azərbaycana efir nəzarətinin dörd əsas və avtomatlaşdırılmamış mərkəzləşdirilmiş şəkildə fəaliyyət göstərən dörd yardımçı məntəqə cəlb edilib.
Mərkəzləşdirilmiş avtomatlaşdırılmış radiomonitorinq şəbəkəsinin yaradılması layihəsi dünən təsdiq edilən "Azərbaycan Respublikasında rabitə və informasiya texnologiyalarının inkişafı üzrə 2010-2012-ci illər üçün Dövlət Proqramı"nda (Elektron Azərbaycan)" nəzərdə tulub. Tədbirlər planına əsasən, radiomonitorinq şəbəkəsinin tətbiqi 2012-ci ildə gözlənilir.
"Bu sistem vasitəsilə tezliklərin effektiv istifadəsi təmin olunacaq - elektron vasitələrinin qeydiyyatı, efirin nəzarəti, efirə girməyin qarşısının alınması. Dünya ictimayyətinin diqqət mərkəzində olan kiberməkanın qorunması nöqteyi-nəzərindən bu layihə aktualdır. Layihə, idarəetmə və büdcə vəsaitləri hesabına həyata keçiriləcək.
Hazırda respublikada və onun kənarında efir məkanına təsir edə biləcək teleradio ötürücülərin sayının artması texniki parametrləri əks etdirən informasiya bazasının yeniləşdiriliməsini (mövcud məlumat bazası 2004-cü ildə yaradılıb) tələb edir.