Azərbaycan, Bakı, 23 avqust /Trend, müxbir H.Vəliyev/
Rusiyanın sistem inteqratoru və korporativ sifarişçilərə informasiya texnologiyaları təchizatçısı "i-Teco" şirkəti Azərbaycan bazarında öz xidmətlərini təklif etməyə hazırdır. Bu barədə Trend-ə bazar ertəsi "i-Teco" şirkətinin MDB ölkələrində korporativ satış üzrə direktoru Stanislav Luçişin deyib.
Onun sözlərinə görə, Azərbaycanın softver bazarı bütün MDB ölkələri arasında həm tutumuna, həm də inkişaf perspektivliyinə görə ən cəlbedicidir.
"Burada İT sahəsinin inkişafı üçün kifayət qədər əlverişli şərait yaranıb. Əksər dövlət və kommersiya təşkilatları biznes-proseslərin avtomatlaşdırılmasına böyük diqqət yetirirlər", - Luçişin qeyd edib.
"i-Teco" Azərbaycanda öz nümayəndəliyi və "ITECO International Limited" şirkəti vasitəsilə 2008-ci ildən işləyir.
Şirkət təsdiq edilmiş tərəfdaşlıq statusuna malik olmaqla, dünyanın aparıcı vendorları ilə əməkdaşlıq edir. Bu yaxınlarda "i-Teco" dünyanın böyük proqram təminatçısı olan ABŞ-ın "Open Text" şirkətinin avtorizə edilmiş tərəfdaşı statusunu alıb. "i-Teco" tərəfdaşlıq proqramı çərçivəsində Azərbaycanın softver bazarına "Open Text"in korporativ kontentin idarə edilməsi sahəsində korporativ informasiya axtarışı bazarında ən tez sistem sayılan "Open Text eDOCS SearchServer"ini çıxarmağı planlaşdırıb.
