Azərbaycan, Bakı, 16 sentyabr /Trend, müxbir H.Vəliyev/
"Autodesk" şirkəti Azərbaycanda tərəfdaş şəbəkəsinin yaradılmasına başlayıb. Bu barədə "Autodesk"in Mərkəzi Asiya və Qafqaz üzrə regional direktoru Rüstəm İbrahimov "İnfocity" Azərbaycan jurnalına verdiyi müsahibəsində deyib.
Şirkət yeddi ildir MDB məkanında fəaliyyət göstərir. "Autodesk"in satış siyasəti ikisəviyyəli modeldə qurulub - paylaşdırma və avtorizə edilmiş tərəfdaşlıq. Şirkət hər il məhsulların yeni növlərini təqdim edir, dünyada doqquz milyondan çox istifadəçiyə abunə yolu ilə çatdırılan yeni modullar tətbiq edir. "Autodesk" Azərbaycanda rəsmi satışa iyul ayında başlayıb.
İbrahimovun sözlərinə görə, şirkət hər zaman maraqlı istqamətləri dəstəkləyir, gənclər və perspektivli işçiləri təşkilatda işə cəlb edərək, onların fəaliyyətini izləyir. Bu gün "Autodesk" şirkəti tərəfindən MDB məkanında belə mütəxəssislər işə cəlb olunmasa da, İbrahimov güclü proqramçılar məktəbi sayəsində böyük potensial görür.
"Biz məhsul istehsalçılarını diqqətlə müşahidə edirik, yeri gəlmişkən, onlardan biri də Azərbaycana ezam olunub və hər zaman onlara yardım göstərməyə çalışırıq", - o bildirib.
İbrahimovun sözlərinə görə, "Autodesk" məhsullarının lokallaşdırılmasına gəldikdə isə, mütləq terminologiyanı müəyyənləşdirmək lazımdır.
"Bizim üçün lokallaşdırma - sadəcə, interfeys tərcüməsi deyil, konkret ölkənin standartlarının tələbi altında məhsulların hazırlanmasıdır. Tərəfdaşlarımız bu məsələni öyrənəcək, əgər Azərbaycan və Rusiyada tətbiq olunmuş standartlar fərqlənərsə, lokallaşdırma məsələsinə baxacağıq", - İbrahimov deyib.
"Autodesk" məhsullarının Azərbaycan dilinə sadə tərcüməsinə gəldikdə isə, şirkətin regional şöbəsinin rəhbəri bu məsələni çətin hesab etməyib; onun sözlərinə görə, bu, gerçəkləşə bilər, lakin hələ ki şirkət tərəfindən əsas amil hesab olunmur.