Azərbaycan, Bakı, 30 sentyabr /Trend, müxbir H.Vəliyev/
Azərbaycan Təhsil Nazirliyi informasiya texnologiyalarından istifadə etməklə yeni təhsil sisteminin tətbiqi məsələsini müzakirə edəcək. Bu barədə cümə axşamı nazirlikdən verilən məlmatda deyilir.
Məsələyə Aİ təhsil məkanında həyata keçirilən "e-Twinning" proqramı çərçivəsində oktyabrın 4-5-də Moldovada keçiriləcək Avropa İttifaqı tərəfindən təşkil olunan "dəyirmi masa" zamanı baxılacaq.
"Dəyirmi masa" zamanı "e-Twinning" platformanın tətbiqi, XXI əsrin pedaqogikası, "e-Twinning" çərçivəsində müəllimlərin peşəkar inkişafı, internet təhlükəsizliyi və s. məsələlər müzakirə olunacaq.
Azərbaycan nümayəndə heyətinin tərkibinə Rabitə və İnformasiya Texnologiyaları Nazirliyi və Bakı Dövlət Universitetinin nümayəndələri daxildirlər.
Avropa Komissiyasınınn təşəbbüsü ilə yaradılan "e-Twinning" proqramı vahid internet platforması bazasında Avropa ölkələri məktəbləri ilə əlaqələrin qurulması məqsədilə həyata keçirilir.
"e-Twinning" çərçivəsində yaradılmış xüsusi internet-portal vasitəsilə müxtəlif ölkələrdən olan məktəblilər öz aralarında ünsiyyət qura, mədəniyyət, tarix haqqında məlumat mübadiləsi və s. edə bilərlər. Proqram artıq beş ildir ki, həyata keçirilir və bu dövr ərzində internet vasitəsilə müxtəlif ölkələrdən minlərlə şagird və müəllim arasında əlaqə qurulub.
