...

Azərbaycan Rabitə Nazirliyi Gəncədə rəqəmsal televiziyanı işə salır

Telekommunikasiya Materials 2 Dekabr 2010 15:00 (UTC +04:00)

Azərbaycan, Bakı, 2 dekabr/Trend, müxbir H.Vəliyev/

Azərbaycan Rabitə və İnformasiya Texnologiyaları Nazirliyinin "Teleradio" İstehsalat Birliyi (İB) Gəncədə rəqəmsal televiziyanın işə salınmasını başa çatdırır. Bu barədə cümə axşamı Trend-ə İB-nin texniki direktoru Mikayıl Abbasov deyib.

Abbasovun sözlərinə görə, İB-nin mütəxəssisləri tərəfindən dekabrın 6-da başa çatmalı olan sistemin tənzimlənməsi üzrə işlər aparılır. Bundan sonra rəqəmsal kontentdən Gəncənin televiziya tamaşaçıları istifadə edə biləcəklər.

Regional səviyyədə on telekanaldan ibarət sosial paket tətbiq ediləcək. O, əsasən Azərbaycan telekanallarından ibarət olacaq və ondan pulsuz əsasda istifadə etmək mümkün olacaq.

"Şirvan və Lənkəranda anten-fider sistemi də quraşdırılıb və siqnal ötürüldükdən sonra rəqəmsal televiziyadan bu rayonlarda da istifadə etmək mümkün olacaq. Bu rayonlarda işlərin dekabrın 20-dək başa çatdırılması planlaşdırılır. Gələn il isə Ağsuda və Azərbaycanın digər rayonlarında işə başlamaq planlaşdırılıb", - Abbasov qeyd edib.

Texniki direktorun sözlərinə görə, cənub istiqamətində - Ələt rayonundan Lerik rayonunadək radiorele xətlərinin çəkilməsi sahəsində də işlər davam edir. Radiorele xətləri rəqəmsal siqnalın Bakıdan cənub zonasına ötürülməsi üçün istifadə ediləcək.

"Bu istiqamətdə cəlb ediləcək stansiyaların ümumi sayı yeddi ədəd təşkil edəcək. İndi dörd stansiyanın quraşdırılması üzrə işlər aparılır. Onlar üzərində işlər dekabrın birinci yarısında başa çatmalıdır", - Abbasov vurğulayıb.

Bu günə "Teleradio" İstehsalat Birliyi tərəfindən on kanaldan ibarət bir rəqəmsal paket işə salınıb. 12 kanaldan ibarət ikinci paket Milli Televiziya və Radio Şurasının qərarının və istehsalat birliyi ilə imzalanacaq müqavilənin olmaması səbəbindən istismar edilmir.

Hazırda rəqəmsal paketdə yalnız Azərbaycan Televiziyası (AZTV), İctimai Televiziya (İTV), Lider, ATV və İdman Azərbaycan kanalı təmsil olunub. Müvəqqəti olaraq paketə RTR, DTV, NTV, Euronews və BBC telekanalları daxil edilib.

Rəqəmsal paketə qalan telekanallar - Space, Xəzər və TRT (Türkiyə) telekanallarının, eləcə də regional telekanalların daxil edilməsi üçün MTRŞ-dən icazə almaq və "Teleradio" İB ilə müqavilə imzalamaq lazımdır.

Hazırda rəqəmsal televiziya Bakı və Abşeron yarımadası ərazisində təcrübi istismara verilib. Rəqəmsal televiziya yayımı MPEG-4 standartında həyata keçirilir. Televiziyanın rəqəmsal standartına keçmək üçün əhali dekoderlər almalıdır. Bakı televiziya qülləsindən yayımlanan siqnal Salyan, Siyəzən və Qobustana çatır.

Xəbər lenti

Xəbər lenti