Azərbaycan, Bakı, 8 dekabr/Trend, müxbir H.Vəliyev/
Azərbaycan Milli Elmlər Akademiyasının (AMEA) İnformasiya Texnologiyaları İnstitutunun (İTİ) AzScienceNet elmi kompüter şəbəkəsi ümumavropanın GEANT3 elmi şəbəkəsinə inteqrasiya edəcək. Bu barədə Trend-ə İTİ-nin direktoru Rasim Əliquliyev deyib.
Onun sözlərinə görə, statusu AMEA-ya Avropanın elmi cəmiyyətlərinin həyata keçirdiyi layihələrdə iştirak etməyə imkan verən TERENA-ın (Trans-European Research and Education Networking Association) milli operatoru qismində İTİ çıxış edir. Onlardan biri GEANT-ın bazalı optik-lif şəbəkəsinin gələcəkdə buraxılış qabiliyyətinin artırılmasını nəzərdə tutan GEANT3-dür.
Hazırda AzScienceNet kompüter şəbəkəsi GEANT2 ümumavropa elmi şəbəkəsinə qoşulub. Perspektivdə akademiya şəbəkəsi təkcə daxili rabitə kanallarının inkişaf etdirilməsi yolu ilə deyil, həm də digər ölkələrin elm-təhsil müəssisələri ilə qarşılıqlı optik-lif şəbəkəsinin təmin edilməsi sayəsində də inkişaf edəcək. Azərbaycanın Black Sea Interconnection (BSI) layihəsi çərçivəsində həyata keçirilən GEANT2 Pan-Avropa tədqiqat şəbəkəsinə qoşulması Azərbaycan tədqiqatçılarının region və Avropa ölkələrinin tədqiqaqçıları ilə əməkdaşlığını gücləndirməyə imkan verəcək.
GEANT2 çoxgiqabitli şəbəkəsi elmi tədris cəmiyyətləri üçün məlumatların ötürülməsinin yüksək məhsuldarlığını, müasir infrastrukturu təmin edir. GEANT2-nin infrastrukturu Avropanın 35 ölkəsinin 30 milli tədqiqat və təhsil şəbəkəsini (NRENs) birləşdirir və dünyanın digər regionları ilə əlaqələrə malikdir.
