Azərbaycan, Bakı, 18 yanvar /Trend, müxbir H.Vəliyev/
Beynəlxalq Telekommunikasiya İttıfaqı (ITU - International Telecommunication Union) Azərbaycana Radiorabitə bürosunun (BRIFIC) tezlikləri üzrə 23 beynəlxalq informasiya göstərişi göndərib. Bu barədə Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsinin məlumatında deyilir.
DRİ-yə daxil olan BRIFIC göstərişləri ilə bağlı prosessual qaydada 256 müəyyən edilmiş stansiyanın, 14 DVB-T, 62 FM və 49 analoq TV stansiyanın tədqiqi (müəyyən edilmiş xidmətlərin ötürücü stansiyaları) üzrə lazımi işlər aparılıb.
GЕ-06 (Cenevrə-06) sazişinə əsasən, Azərbaycan Radiotezliklər İdarəsi tərəfindən 171 müəyyən edilmiş stansiyanın qeydiyyata alınması haqqında ərizə hazırlanaraq baxılmaq üçün ITU-ya təqdim olunub.
GЕ-06 sazişi rabitə administrasiyaları arasında tezliklərə yiyələnmənin koordinasiyasının aparılması imkanını nəzərdə tutur. GЕ-06 sazişinin mətnində yerüstü radioyayım xidmətlərinin modifikasiyası və koordinasiyası göstərilib.
Radiorabitə reqlamentinin müddəalarına uyğun olaraq digər ölkənin mövcud və ya planlaşdırılan stansiyalarına maneəyə səbəb olacaq və ya özü belə stansiyaların təsiri altına düşəcək istənilən özəl yiyələnmə ITU-nun Radiorabitə bürosuna tezliklərin beynəlxalq sorğu reyestrində qeydiyyatdan keçmək üçün bildirilməlidir.
