Azərbaycan, Bakı, 10 fevral /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi "Bakı telefon rabitəsi" İstehsalat Birliyinin (İB) rəhbərliyinə ölkədə internet-servis-provayderlərin biznesinin inkişafına yardımın göstərilməsi ilə bağlı göstəriş verib. Bu barədə cümə axşamı Azərbaycan İnternet Cəmiyyətinin sədri Qalib Qurbanov deyib.
Qurbanovun sözlərinə görə, İB rəhbərliyi tərəfindən bürokratik maneələrin aradan qaldırılması və internet-provayderlərin coğrafi genişləndirilməsi və "Bakı telefon rabitəsi" İB-nin telekommunikasiya qovşaqları ilə internet xidmətlərin göstərilməsi zamanı lazımi kömək barədə müvafiq göstəriş verilib.
Operatorun internet provayderlərlə qarşılıqlı fəaliyyət məsələsinə İB-də bütün internet provayderlərin, eləcə də telekommunikasiya qovşaqlarının rəhbərlərinin və "Bakı telefon rabitəsi"nin bütün infrastuktur bölmələrinin iştirakı ilə keçirilən görüşdə baxılıb.
"İnternet provayderlərin rabitə operatorları ilə kifayət qədər kəsişmə nöqtələri var və bizim xidmətlərimizdən çoxu məhz onlardan [opertorlardan] asılıdır. İstehsalat Birliyinin rəhbərliyi internet provayderlərin həm ADSL avadanlığın quraşdırılmasına, həm də bu xidmətə qoşulmaqla bağlı daxil olan bütün müraciətlərin yubanmadan yerinə yetirilməsi barədə ciddi tapşırıqlar verib", - Qurbanov əlavə edib.
İnternet Cəmiyyətinin sədrinin sözlərinə görə, İB tərəfindən internet provayderlər üçün operatorun platforması vasitəsilə ADSL xidmətinə qoşulmaq üçün müraciətin elektron şəklində verilməsi, bütün provayderlərin istifadəçiləri isə texniki qüsurların aradan qaldırılması üçün əvvəllər dövlət internet servis provayderi "BakinterNet"in istifadə edə bildiyi vahid nömrə üzrə (155) müraciət etmələri ilə bağlı imkanın yaradılmasına dair göstəriş verilib.
Bundan əvvəl Azərbaycanın rabitə və informasiya texnologiyaları naziri Əli Abbasov Aztelekom və "Bakı telefon rabitəsi" istehsalat birliklərinin rəhbərliyinə özəl internet servis provayderlərin biznesinin inkişafı üçün lazımi şəraitin yaradılmasına köməyin göstərilməsi barədə tapşırıq verib.
Abbasovun sözlərinə görə, nazirliyə dəfələrlə dövlət rabitə operatorlarının telekommunikasiya qovşaqları vasitəsilə bəzi provayderlərə öz bizneslərinin inkişaf etdirilməsində manelərin yaradılması barədə şikayətlər daxil olub. Onun sözlərinə görə, bu, yol verilməzdir.
