Azərbaycan, Bakı, 19 fevral /Trend, müxbir H.Vəliyev/
Azərbaycanda vətəndaşlara biometrik pasportların verilməsi prosedurunu tənzimləyən yekun sənədin qəbul edilməsi gözlənilir. Bu barədə şənbə günü Trend-ə Azərbaycan Ədliyyə Nazirliyi yanında Əhalinin Dövlət Reyestri Xidmətindən bildiriblər.
Yeni nəsil pasportların verilməsi 2012-ci ilin sonunadək başlanacaq. Biometrik pasportların nümunələri İsveçrənin "Trüb AG" şirkəti tərəfindən hazırlanacaq.
Hazırda "Trüb AG" şirkəti Azərbaycana Beynəlxalq Mülki Aviasiya Təşkilatının (BMAT) standartlarına uyğun yeni nəsil biometrik pasportların kompleks sisteminin işlənməsi və həyata keçirilməsi üçün layihələrin idarə olunmasına dair hərtərəfli məsləhət və xidmətlər təqdim etməyə başlayıb.
Azərbaycanın biometrik pasportlarında inteqrallaşdırılmış kontaktsız çip olan polikarbonat səhifə olacaq. Səhifələr lazer oyması ilə optiki personallaşdırılacaq və müxtəlif birləşdirilmiş təhlükəsizlik funksiyalarını ehtiva edəcək.
Şirkət pasportların verilməsi ilə məşğul olacaq 12-yə yaxın personallaşdırma mərkəzinin layihələndirilməsi və inşasını həyata keçirəcək. Bu məqsədlə o, lazer maşınları və "Trackstar" proqram təminatının alışını həyata keçirəcək. "Trackstar" sistemi "Trüb AG" şirkəti tərəfindən şəxsiyyəti təsdiq edən sənədlərin personallaşdırılması və idarə olunması üçün işlənmiş effektiv şəbəkədir.
"Trüb AG", həmçinin, uzunmüddətli perspektivdə reallaşdırdığı şəbəkələrin texniki xidmətinin və saxlanmasının təmin edilməsi üçün məsuliyyət daşıyır. Şirkət Azərbaycan hakimiyyətini şəxsiyyəti təsdiq edən sənədlərlə tanışlıq prosesi, eləcə də məlumatların toplanması, açıq açarlar infrastrukturundan (PKI-Public Key Infrastructure) istifadə zamanı dəstəkləyəcək. PKI sistemi çipdəki məlumatların məxfiliyinin (pasport sahibi haqqında fərdi məlumatları, üzün və iki barmağın izinin təsvirlərini) qorunmasını təmin edəcək ümummilli sertifikatlaşdırılmanın yaradılması üçün tətbiq ediləcək.