Azərbaycan, Bakı, 3 mart /Trend, müxbir H.Vəliyev/
"AzeriCard" Prosessinq Mərkəzi "elNavi" şirkəti ilə birlikdə onlayn rejimdə naviqasiya proqramlarının əldə edilməsi imkanını təqdim edib. Bu barədə "AzeriCard"ın məlumatında deyilir.
"elNavi" mobil xəritəsi (www.elnavi.az) Azərbaycan dilində səs funksiyası ilə təmin olunmuş, Azərbaycanın bütün yol xəritəsini göstərən, mobil telefonlar, smartfonlar və naviqasiya avadanlıqları üçün naviqasiya proqramıdır.
Ödəniş üçün VISA, VISA Electron, MasterCard və Maestro kartları qəbul olunur. Təhlükəsizlik "3D Secure" texnologiyası vasitəsilə təmin olunur.
Bu gün prosessinq mərkəzi tərəfindən "AzeriCard" sistemində xidmət göstərən plastik kart sahibləri üçün internet-ödənişin həyata keçirilməsi zamanı "3D Secure" parolunun daxil edilməsinə imkan verən modul aktivləşdirilib.
"3D Secure" parolu bilavasitə sayt (əgər sayt 3D Secure texnologiyasında çalışırsa) vasitəsilə mal və xidmətlərin ödənişini həyata keçirməyə imkan verən kartlar üçün "pin"dir. Sayt "3D Secure" texnologiyasını dəstəkləyəndə, sistem yalnız kart sahibinə məlum olacaq "3D Secure"nin parolunun daxil edilməsini avtomatik olaraq istəyəcək. Şəbəkədə məlumatların təhlükəsiz ötürülməsi şifrləmə protokolu SSL-dən (Secure Socket Layer) istifadə etməklə təmin olunur.
3D Secure protokolu Visa International və Master Card beynəlxalq ödəniş sistemləri tərəfindən internet şəbəkəsində əməliyyatlar edən müştərilərin vəsaitlərinin qorunması, bank və şirkətlərin zərərlərinin azaldılması məqsədi ilə hazırlanıb.
