Azərbaycan, Bakı, 7 mart /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi paytaxt ərazisində "Tac Kart" (əvvəllər regional telekommunikasiya qovşaqlarına istiqamətlənmiş) xidmətinin əhatə zonasını genişləndirib. Bu barədə bazar ertəsi Trend-ə İB-dən məlumat verilib.
Bu gün xidmət demək olar ki, bütün regional telekommunikasiya qovşaqlarını (Ermənistan tərəfindən işğal olunan Azərbaycan əraziləri istisna olmaqla) əhatə edir.
Perspektivdə xidmət Naxçıvan Muxtar Respublikasının bütün TKQ-də də genişləndiriləcək.
"Tac Kart" sistemi rabitə sahəsində istifadə olunan kredit sistemidir. Danışıqdan sonra haqqın ödənilməsini nəzərdə tutan debitor sistemdən fərqli olaraq, "Tac Kart" sistemi balansa vəsait keçirdikdən sonra zənglərin həyata keçirilməsinə imkan verir.
Pul vəsaitlərinin balansa yüklənməsi üçün 181 nömrəsindən istifadə olunur. Bunun ardınca abonent beynəlxalq və şəhərlərarası danışıqların həyata keçirilməsi üçün 123 kodunu yığır.
Abonentlərə iki, dörd və on manat nominalında kartlar təklif olunur.
