Azərbaycan, Bakı, 9 mart /Trend, müxbir H.Vəliyev/
Azərbaycanın ilkin provayderi olan "Delta Telecom" şirkəti ən iri beynəlxalq operatorlardan biri "Level 3 Communications" şirkəti ilə əməkdaşlıq haqqında saziş imzalayıb. Bu barədə "Delta Telecom"un texniki direktoru Rahid Ələkbərli məlumat verib.
Ələkbərlinin sözlərinə görə, "Level 3" ilə saziş "Tier1" səviyyəsində şəbəkəyə daxil olmaq üzrə sayca üçüncü müqavilədir. Şirkət "TeliaSonera" və GLOBEINTERNET (TATA Communications) kimi ən iri beynəlxalq operatorlarla da analoji müqavilələrə malikdir.
"Level 3" ilə birləşmə "Delta Telecom"a qlobal şəbəkəyə daha bir alternativ çıxış əldə etməyə, ölkəyə daxil olan trafikin həcmini artırmağa və Azərbaycanın internet seqmentinin davamlılığını artırmağa imkan verib.
"Level 3 Communications"la əməkdaşlıq bizə "Tier1" səviyyəsində şəbəkəyə daxil olmaq üçün yeni imkan verdi. Yeni şəbəkəyə qoşulmaqla biz dünya internet şəbəkəsinə, yəni Amerika və Avropa kontentlərinə və resurslarına daha da yaxın olmaq imkanı əldə etdik. Lakin ilk növbədə, burada söhbət Azərbaycan operatorları tərəfindən təqdim olunan məlumatların ötürülməsi sürətinin artırılması, şəbəkənin davamlılığı və internet xidmətlərinin keyfiyyətindən gedir", - Ələkbərli deyib.
"Delta Telecom" və "Level 3 Communications" şirkətlərinin imzaladıqları saziş çərçivəsində ölkəyə daxil olan trafik bir neçə, perspektivdə isə onlarla Qbit/s artırılacaq.
"Level 3 Communications" şirkəti "Tier1" operatoru və ABŞ və Avropada təmsil olunan dünyada ən iri telekommunikasiya şirkətidir. Məlumatların ötürülməsi (backbone) magistral kanallarının dünyada ən iri şəbəkələrindən biri "Level 3"-ün sərəncamındadır.
