Azərbaycan, Bakı, 14 aprel /Trend, müxbir H.Vəliyev/
"Fujitsu" şirkəti Azərbaycanın İT bazarının inkişaf templərindən razıdır. Trend-in məlumatına görə, bu barədə strukturun regional meneceri Gennadi Gerasimov deyib.
Gerasimovun sözlərinə görə, "Fujitsu"nun Azərbaycan bazarında illik satış həcmi pul vahidində 5 milyon dollara çatır. Şirkət növbəti maliyyə ilində də analoji həcmi gözləyir.
"Bizim üçün Azərbaycan bazarı ən nümunəvidir. Sözsüz ki, dünya maliyyə böhranı dövründə Azərbaycan bazarı üzrə bizim dövriyyəmiz bir qədər azalmışdı, lakin vəziyyət yaxşılaşır və biz satış həcminin artacağını gözləyirik", - o qeyd edib.
"Fujitsu"nun regional menecerinin fikrincə, Azərbaycanda şirkətin daha böyük həcmi istehlak seqmentinin payına düşür.
"Bu yaxınlarda biz azərbaycanlı tərəfdaşlarımızla Azərbaycanın Əmək Nazirliyinin elan etdiyi böyük tenderin qalibi olmuşuq. Tərəfimizdən təxminən 500 min dollar məbləğində lazımi avadanlıq, məlumatların emalı və proqram təminatı mərkəzləri tədarük edilib. Bu, "Fujitsu" şirkəti üçün əlamətdar layihə olub", - Gerasimov bildirib.
Şirkətin server həllərinin az populyar olmasının və ümumilikdə şirkətin ölkənin korporativ seqmetində güclü olmayan mövqeyinin əsas səbəbi onun Azərbaycan bazarına gec gəlməsidir. Onun fikrincə, Azərbaycanda digər dünya vendorları öz yerlərini möhkəmləndirib. "Fujitsu"nun regional meneceri hesab edir ki, şirkət Azərbaycan bazarına gəlişə təxminən 20 il gecikib. Gerasimovun fikrincə, bu müddət ərzində istifadəçilərdə özünəməxsus stereotip formalaşıb.
"İstehlakçı hesab edir ki, surətçıxarma avadanlığı mütləq Xerox, çapetmə - HP, kompüter - IBM olmalıdır. Bu, pozulması lazım olan köhnəlmiş stereotiplərdir", - o vurğulayıb.