Azərbaycan, Bakı, 13 sentyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Teleradio" İstehsalat Birliyi rəqəmsal telekanalların sayını 24 ədədə qədər artırır. Bu barədə Trend-ə çərşənbə axşamı "Teleradio" İB-nin baş direktoru Əflatun Şərifov bildirib.
Şərifovun sözlərinə görə, rəqəmsal paketin üstünlüyü "BakuTel -2011" 17-ci Beynəlxalq telekommunikasiya sərgisi (23-26 noyabr) çərçivəsində nümayiş olunacaq.
"Biz Bakıda yeni 40 kanallı baza stansiyası quraşdırmışıq. Mən bunu özünü texniki baxımdan doğrultmuş addım hesab edirəm. Yeni nəsil baza stansiyası çoxfunksiyalıdır və televiziya kanallarının sayını mərhələli şəkildə genişləndirməyə imkan verir. Telekanalların sayının artırılması alınan əlavə avadanlıqlardan və ötürücülərdən asılı olacaq", - o bildirib.
Bu gün 12 televiziya kanalından ibarət rəqəmsal paket Bakıda və Abşeron yarımadasında təcrübə istismarındadır. Paketin tərkibinə əsasən respublikadakı əsas televiziya kanalları daxil edilib. Bunlar Azərbaycan Dövlət Televiziyası (AzTV), İcvtimai televiziya (ITV), Lider, ATV, İdman Azərbaycan, "Mədəniyyət" telekanalı və digərləridir.
Rəqəmsal kontentin yayımı MPEG-4 standartında həyata keçirilir. Rəqəmsal standarta keçmək üçün televiziyanın dekoder alması vacibdir.
Dekoderlərin qiymətlərinə gəlincə, Şərifov hesab edir ki, onların hazırki qiymətləri (40 manat) respublika əhalisinin əksəriyyəti üçün o dərəcədə problem yaratmayacaq.
O bildirib ki, rəqəmsal yayıma tam keçid tədricən olacaq. İlkin mərhələdə efir və rəqəmsal televiziya yayımı əhalinin böyük əksəriyyəti dekoderlər alanadək paralel həyata keçiriləcək. "Hər şeydən göründüyü kimi, dövlət əhalinin aztəminatlı təbəqələrinin də dekoderlərə malik olması üçün müəyyən addımlar atır", - Şərifov bildirib.