Azərbaycan, Bakı, 19 yanvar /Trend, müxbir H.Vəliyev/
ABŞ-ın "Symantec" şirkəti Azərbaycan Rabitə və İnformasiya Texnologiyaları Nazirliyində "Symantec Security Information Manager" (SSIM) həllini tətbiq edir. Bu barədə cümə axşamı Trend-ə "Symantec" şirkətinin Qazaxıstan, Mərkəzi Asiya və Cənubi Qafqaz üzrə satış direktoru Aleksandr Yakunin deyib.
SSIM sistemi mənfi halların qarşısının alınmasına yönəldilmiş operativ qərarlar qəbul etmək imkanını təqdim etməklə şəbəkədə baş verən bütün prosesləri müşahidə etməyə imkan verir. Sistem bütün baş verən hadisələri sənədləşdirməyə və onları bir neçə il ərzində saxlamağa imkan verir.
Yakuninin sözlərinə görə, Azərbaycanın Rabitə Nazirliyində tətbiq edilən sistem ofislərin idarə edilməsində qlobal sistemə malik "British Petroleum" şirkətinin hazırda tətbiq etdiyi analoji sistemdir. Sistemin baş mərkəzi Londonda yerləşir və orada bütün zəruri informasiya toplanılır.
AZEL şirkətindən ("Symantec"in Azərbaycanda rəsmi tərəfdaşı) əvvəl Trend-ə verilən məlumata görə, 2012-ci ildə Azərbaycanda İnformasiya Təhlükəsizliyi üzrə Milli Mərkəzin yaradılması planlaşdırılır.
Mərkəzin vəzifəsinə şəbəkə strukturlarının vəziyyətinin izlənilməsi, yeni təhlükələrin yaranması və onlara qarşı mübarizə tədbirləri haqqında istifadəçilərin məlumatlandırılması, təşkilatlara onların informasiya təhlükəsizliyinin və s. pozulması halında operativ kömək daxil olacaq.
Azərbaycanda həyata keçirilməsi planlaşdırılan layihə xüsusi xidmət orqanları, eləcə də izləmə və potensial təhlükələrə vaxtında reaksiya göstərilməsi şəbəkələri ilə birgə məlumatların işlənməsi mərkəzinin yaradılmasını nəzərdə tutur.
