Azərbaycan, Bakı, 13 aprel /Trend, müxbir H.Vəliyev/
"AiləNET" şirkəti Bakı şəhəri ərazisində simsiz "Wi-Fi" xidmətinin işə salınması üzrə plan hazırlayıb. Bu barədə cümə günü Trend-ə şirkətin mətbuat katibi Teymur Hacıyev bildirib.
"Simsiz "Wi-Fi" nöqtələri paytaxtın ictimai yerlərində, insanların kütləvi toplaşdığı ərazilərdə, parklarda və ali məktəblərdə işə salınacaq", - Hacıyev deyib.
Layihənin işə salınması 2013-cü ilin əvvəlinə planlaşdırılıb. Şirkət artıq zəruri texniki avadanlıqların alınmasına başlayıb.
"İstifadəçilər "AiləNET" şəbəkəsi üzərindən "Ailə Wi-Fi" xidmətinə çıxış imkanı əldə edəcəklər. Bu məqsədlə layihə üçün xüsusi yaradılmış saytda qeydiyyatdan keçmək, həmçinin "Ailə TV" şirkətindən xəbərlərin göndərişinə abunə yazılmaq lazım olacaq", - Hacıyev qeyd edib.
Onun sözlərinə görə, şəbəkəni yükləməmək üçün məlumatların ötürülmə sürəti, ağır kontentə (həcmli fayların yüklənməsi) çıxış məhdudlaşdırılacaq. Heç bir məhdudiyyət olmadan xidmətlərdən istifadə pullu əsasda mümkün olacaq.