Azərbaycan, Bakı, 3 noyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Teleradio" İstehsalat Birliyi IP-televiziya xidmətlərinin göstərilməsi üzrə özəl şirkətlərlə danışıqlar aparır. Bu barədə şənbə günü Trend-ə İB-dən məlumat verilib.
Hazırda IP-TV formatında siqnallar "Aztelekom" və "Bakı Telefon Rabitəsi" dövlət rabitə operatorlarının şəbəkələrinə ötürülür. Operatorların şəbəkələrinə verilən telekanalların sayı 120 ədədi keçir ki, bu da Bakıda İB-nin quraşdırdığı baza stansiyasının ötürmə qabiliyyətinin müasirləşdirməsi nəticəsində mümkün olub.
Avadanlıqların tədarükçüsü ABŞ-ın "Harmonic" şirkətidir.
Bu gün İstehsalat Birliyinin təklif etdiyi xidmətlər arasında "Video on Demand" (VoD), "TVoIP", "Time Shifted TV", "Network Personal Video Recorder", "Electronic Program Guide" və başqaları var.
Perspektiv planlara İB-nin video-telefoniya və digər informasiya-əyləncə xidmətlərinin genişləndirilməsi daxildir.
