Azərbaycan, Bakı, 25 sentyabr /Trend, müxbir Hüseyn Vəliyev/
2014-cü ilin dekabrınadək Azərbaycan əhalisi rəqəmsal televiziya siqnalı ilə tam əhatə olunacaq. Trend-in məlumatına görə, bunu jurnalistlərə rabitə və yüksək texnologiyalar nazirinin müavini İltimas Məmmədov deyib.
Onun sözlərinə əsasən, hazırda ölkə əhalisinin 98 faizi rəqəmsal televiziyadan istifadə edə bilər: "Ucqar dağlıq rayonlarda yerləşən yaşayış məntəqələri istisna təşkil edir".
İ.Məmmədov vurğulayıb ki, bu yaşayış məntəqələrində rəqəmsal siqnal yayımını genişləndirmək üçün gücü az olan ötürücü aparatlar quraşdırılır: "Dekabra qədər ölkə əhalisinin rəqəmsal TV siqnalı ilə tam əhatə olunacağı gözlənilir. Hazırda analoq və rəqəmsal formatlarda yayım paralel aparılır və növbəti mərhələ rəqəmsal televiziya yayım standartına keçməklə analoq siqnalın tam dayandırılması olacaq".
Nazir müavini bildirib ki, əhalinin aztəminatlı təbəqələrinin rəqəmsal dekoderlərlə təminatı məsələsi rəqəmsal TV standartına tam keçiddə ən vacib aspektlərdən bidirir.
Onun sözlərinə görə, aztəminatlı ailələrin rəqəmsal dekoderlərlə təminatı çərçivəsində işlər müvafiq dövlət strukturları tərəfindən aparılır: "Əhalinin aztəminatlı təbəqələrinə həmin qurğuların verilməsi haqqında qərar qəbul olunduqdan sonra analoq siqnal tam dayandırılacaq".