Bakı. Trend:
Bakıda "mygov" rəqəmsal hökumət platformasının yenilənmiş versiyasının təqdimatı keçirilib.
Trend xəbər verir ki, tədbir çərçivəsində Azərbaycanın rəqəmsal inkişaf və nəqliyyat nazirinin müavini Samir Məmmədov, Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin idarə heyətinin sədri İnara Vəliyeva və digər nümayəndələr çıxış ediblər.
Azərbaycanın rəqəmsal inkişaf və nəqliyyat nazirinin müavini Samir Məmmədov çıxışı zamanı bildirib ki, bu ilin sonuna qədər vətəndaşlara fiziki şəkildə göstərilən xidmətlərin 15 faizi rəqəmsallaşdırılacaq.
Onun sözlərinə görə, "mygov" vasitəsilə vətəndaşlar şəxsi məlumatlarına daxil ola, onları yeniləyə, vacib bildirişləri izləyə və gündəlik prosesləri bir neçə kliklə avtomatlaşdıra bilərlər. Bu, daha şəffaf və istifadəçi yönümlü rəqəmsal ekosistemin inkişafına kömək edəcək, ofis ziyarətlərini və mürəkkəb kağız işlərini aradan qaldıracaq.
“Məqsədlərimizə uyğun olaraq, ilin sonuna qədər vətəndaşlara fiziki formatda göstərilən xidmətlərin 15 faizini rəqəmsallaşdırılmağı planlaşdırırıq”, - o əlavə edib.
S.Məmmədov qeyd edib ki, "Rəqəmsal Sənəd Dövriyyəsi" (RSD) sisteminə artıq 1 700-dən çox təşkilat inteqrasiya olunub.
O vurğulayıb ki, COP29-un sədri kimi Azərbaycan, davamlı və innovativ rəqəmsal həllərin tətbiqinə xüsusi diqqət yetirir.
"Bu həllərdən biri olan "Rəqəmsal Sənəd Dövriyyəsi" (RSD) sistemi, proseslərin effektivliyini əhəmiyyətli dərəcədə artırır və ətraf mühitə təsirini azaldır. RSD-nin istifadəsi dövlət qurumlarına aylıq 500 mindən çox kağız səhifəsini qənaət etməyə imkan verir, bu isə ildə təxminən 2 min ağacın qorunmasına bərabərdir. Hazırda sistemə 1 700-dən çox təşkilat inteqrasiya olunub, bu da onun dövlət rəqəmsallaşması çərçivəsindəki əhəmiyyətini və uğurunu vurğulayır", - deyə o bildirib.
Öz növbəsində, Azərbaycanın Nəqliyyat və Rəqəmsal İnkişaf Nazirliyi yanında İnnovasiyalar və Rəqəmsal İnkişaf Agentliyinin idarə heyətinin sədr müavini Rəşad Xalıqov bildirib ki, yenilənmiş "mygov" platforması mühüm hadisələrin sənədləşdirilməsini əhəmiyyətli dərəcədə asanlaşdırıb.
“Yenilənmiş platforma mühüm hadisələrin, məsələn, nikah, uşaqların doğulması və yaxın qohumların vəfatının sənədləşdirilməsini əhəmiyyətli dərəcədə asanlaşdırıb. İndi nikah üçün lazım olan sənədləri rəqəmsal formatda təqdim etmək, yeni doğulmuş uşaqları onlayn qeydiyyatdan keçirmək və qohumların vəfatını da platforma vasitəsilə qeyd etmək mümkündür. "mygov" tətbiqinin "mənim məlumatlarım" bölməsində şəxsiyyət vəsiqəsi, nikah, doğum və ölüm haqqında şəhadətnamələr kimi 40-dan çox müxtəlif məlumat qeydləri saxlanılır. İstifadəçilər bu sənədləri və məlumatları QR-kod və ya PDF formatında paylaşa bilərlər. Bundan əlavə, tətbiq məlumat mübadiləsinin tarixini izləməyə, məlumatların hansı qurumlarla və nə vaxt paylaşıldığını görməyə imkan tanıyır. Həmçinin, müxtəlif dövlət orqanları tərəfindən tələb olunan şəxsi məlumatlara giriş icazələrinin idarə edilməsi imkanı təqdim edilir”, - Rəşad Xalıqov bildirib.
Onun sözlərinə görə, digər yeniliklər arasında təkmilləşdirilmiş axtarış sistemi, bildiriş modulu və ərizələrin təqdimatı funksiyası var, bu da vətəndaşların dövlət xidmətləri ilə daha sürətli və şəffaf şəkildə əlaqə qurmasına imkan tanıyır.
"Platformada həmçinin elektromobillər üçün şarj stansiyalarının siyahısı, kommunal abonent kodlarının dəyişdirilməsi, pensiya kalkulyatoru və yerli hakimiyyət orqanlarına qəbul üçün qeydiyyat kimi xidmətlər mövcuddur", - əlavə edib.
