May ayında Cənubi Koreya prezidenti Azərbaycana rəsmi səfər edəcək. Rabitə və İnformasiya Texnologiyaları Nazirliyindən Trend ə verilən məlumata görə, bu barədə Cənubi Koreyanın Azərbaycandakı müvəqqəti işlər müvəkkili Kim Sonq Xvan rabitə naziri Əli Abbasovla görüşündə bildirib.
Müvəkkilin sözlərinə görə, Azərbaycan prezidentinin də Cənubi Koreyaya səfəri gözlənilir. O vurğulayıb ki, yaxın vaxtlarda Seulda Azərbaycanın səfirliyi açılacaq.
Diplomat hər iki ölkə arasında informasiya və kommunikasiya texnologiyaları sahəsində əməkdaşlığa dair sazişin hazırlanmasından məmnunluğunu bildirərək qeyd edib ki, "Keyti" şirkəti Azərbaycanın İT bazarına girmək və burada filial açmaq niyyətindədir.
Əli Abbasov bildirib ki, Azərbaycan Cənubi Koreya ilə bütün sahələrdə, xüsusilə İKT sahəsində əməkdaşlıqda həmişə maraqlıdır.
Görüş zamanı nazir sahibkarları maraqlandıran suallara cavab verib və Azərbaycanda fəaliyyət göstərən xarici şirkətlər tərəfindən elektron malları istehsalının artırılmasının əhəmiyyətini vurğulayıb.
Görüşdə, həmçinin, nazirliyin məsul şəxsləri də iştirak edib.