Rabitə və İnformasiya Texnologiyaları Nazirliyi yeni portal üzərində işi başa çatdırır. Nazirliyin Strateji Planlaşdırma və Elmi Potensial şöbəsinin rəiçi Rüfət Gülməmmədovun Trend ə verdiyi məlumata əsasən, portalın Azərbaycan versiyası artıq hazırdır və hazırda rus və ingilis versiyalarının yaradılması istiqamətində paralel iş aparılır.
"Portalı yayın sonuna qədər təhvil vermək planlaşdırılır. Bu proses çox vaxt aparır, çünki hazırda 3500 səhifəlik material tərcümə edilir" - deyə nazirlikdən qeyd ediblər.
Yeni portalda Azərbaycanın rabitə və informasiya texnologiyaları sahəsinin hazırkı vəziyyəti, xidmətlər, İKT sahəsi, layihələr, qanunverici baza barədə məlumat veriləcək. Portalda istifadəçilərə xridmət göstərilməsi üçün xüsusi bölmə olacaq. Abunəçilər onları maraqlandıran məsəllərlə bağlı istənilən məlumatı ala biləcək.
Portalda həmçinin İKT üzrə yerli özəl şirkətlər, birgə müəssisəslər, beynəlxalq təşkilatlar, təhsil ocaqlarına istinad olacaq.
R.Gülməmmədov vurğulayıb ki, portalın ünvanı dəyişməyəcək (www.mincom.gov.az).