2006-cı ilin yanvar-iyul aylarında Naxçıvan Muxtar Respublikasında (NMR) rabitə xidməti sahəsində müəssisə, təşkilat və əhaliyə 1429,1 min manat həcmində xidmət göstərilib, bu isə 2005-ci ilin analoji dövrü ilə müqayisədə 14,7% çoxdur. Bu barədə Trend ə NMR-in Bakıdakı daimi nümayəndəliyindən bildirilib.
Muxtar Respublikanın Rabitə və İnformasiya Texnologiyaları Nazirliyi tərəfindən 2095 telefon xətti çəkilib və bu, ötən ilin həmin dövründən 239 vahid və ya 12,9% çoxdur.
Göstərilən dövr ərzində NMR müəssisələrində işçilərin sayı 811 nəfər təşkil edib. Hər bir əməkdaşın orta aylıq əmək haqqı 2005-ci illə müqayisədə 7,3% artıb və 117,2 manat təşkil edib.
Bundan başqa, həmin vaxt ərzində NMR rabitəsi Trans-Asiya-Avropa (TAA) fibrooptik magistralına qoşulub. İki şəbəkə istismara verilib - Naxçıvan və Bakı arasında STMİ səviyyəsində tranzit şəbəkə və muxtar respublikanın ərazisində magistral üzrə SDH şəbəkəsi. Birinci şəbəkə müxtəlif data- kanalların, videokonfransların, videotelefonların və s. yaradılması üçün kifayət qədər ehtiyata malikdir. İkinci şəbəkə Babək, Culfa, Nehrəm, Abraqunus, Gülüstan mərkəzi avtomat telefon stansiyalarını əhatə edir. Bu stansiyalar əvvəllər radiolinklər vasitəsilə işə salınıb. Həmçinin CDMA texnologiya xidmətləri işə salınıb, Bakcell tərəfindən mobil rabitənin tətbiq edilməsi üzrə işlər görülür.
