Azərbaycanın Rabitə və İnformasiya Texnologiyaları Nazirliyi yeni portalını 2007-ci ilin yanvar ayında təqdim etmək niyyətindədir. Nazirlikdən Trend ə verilən xəbərə görə, hazırda bu istiqamətdə bütün işlər tamamlanıb.
"Veb-saytın təqdimatının Azərbaycanda rabitə və informasiya texnologiyalarının inkişafı üzrə dövlət proqramının ("Elektron Azərbaycan") illik fəaliyyət yekunlarının müzakirəsinə həsr olunmuş geniş konfrans zamanı keçirilməsi planlaşdırılır", - deyə nazirlikdən bildirilib.
Bu, dövlət səviyyəsində tədbir olacaq və tədbirdə ölkənin müxtəlif dövlət idarələrinin vəzifəli şəxslərinin iştirakı gözlənilir.
"Elektron Azərbaycan" dövlət proqramı 2005-2008-ci illəri əhatə edir və iqtisadi-struktur islahatlarının həyata keçirilməsinə, rabitə və informasiya texnologiyaları sahəsində təkmilləşdirmə və genişləndirməyə, informasiya cəmiyyətinə keçidin təmin olunması üzrə layihələrin reallaşdırılmasına yönəldilib.
Dövlət proqramının əsas məqsədi Azərbaycanda rabitə və informasiya texnologiyalarının inkişafının, eləcə də ölkədə İKT-nin inkişafı üzrə Milli Strategiyanın reallaşdırılmasının təmin olunması, adı çəkilən sənəd üzrə müəyyən olunmuş fəaliyyətin məqsəd və istiqamətlərinə əsasən layihələrin planlaşdırılması və icrasıdır.
Proqramda nəzərdə tutulmuş tədbirlərin həyata keçirilməsi nəticəsində müasir tələblərə əsas ən rabitə və informasiya texnologiyaları infrastrukturunun yaradılması, yeni texnologiyaların mənimsənilməsi və informasiya cəmiyyətinə keçidin əsaslarının yaradılması gözlənilir.