Azərbaycan Rabitə və İnformasiya Texnologiyaları Nazirliyinin Aztelekom İstehsalat Birliyinin (İB) Gəncə telekommunikasiya qovşağı (TKQ) Gəncədə NGN (Next Generation Network) şəbəkəsinin yaradılması üzrə tender paketlərinin açılış tarixini yanvarın 18-dən 24-ə keçirib. Bu barədə Trend İB-yə istinadən xəbər verir.
Bakıda bu texnologiya ilk dəfə Çinin Huawei şirkətindən alınmış avadanlıq hesabına Bakı Telefon Rabitəsi İB-nin (BTRİB) abunəçilərinə ötən il təqdim olunub.
NGN (növbəti nəsil şəbəkəsi) nitqin, təsvirin və paketlərin komutasiyasından istifadə etməklə verilənlərin ötürülməsi üçün nəzərdə tutulmuş universal çoxməqsədli şəbəkədir. NGN şəbəkəsi telekommunikasiya trafikinin müxtəlif növləri üçün lazım olan xidmət keyfiyyətini təmin edir. Yuxarıda göstərilən texnologiyanın tətbiqi abunəçilərə VoIP-telefoniya, səsli poçt, verilənlərin ötürülməsi xidməti, multimediya xidmətləri, virtual özəl şəbəkələr, məlumatların unifikasiya edilmiş mübadiləsi, ani məlumat mübadiləsi, interaktiv nitq cavabı sisteminin xidmətləri, interaktiv oyunlar, videokonfrans və ev meneceri kimi xidmətlərdən istifadə etmək imkanı verəcək.
