Azərbaycan Milli Elmlər Akademiyasının (AMEA) İnformasiya Texnologiyaları İnstitutunda (İTİ) Elmi Şuranın iclası keçirilib. Trend AMEA İTİ -yə istinadən xəbər verir ki, iclasda Soros Fondunun İnformasiya proqramları üzrə məsləhətçisi Rassel Sautvud və GİPİ (Global İnternet Policy İnitiative) şirkətinin Azərbaycan üzrə koordinatoru Yaşar Hacıyev iştirak edib.
Tədbirin əsas məqsədi Azərbaycan Respublikasında informasiya kommunikasiya texnologiyaları (İKT) sahəsinin vəziyyətilə tanışlıq idi.
İnstitutun direktoru Rasim Əliquliyev rəhbərlik etdiyi elmi təşkilatın yaranma tarixi, elmi fəaliyyəti və son illərdə əldə etdiyi nailiyyətlər haqqında qısa məlumat verib.
III minilliyn əsas ideologiyasının informasiya cəmiyyətinin qurulması və bu cəmiyyətin formalaşmasında informasiya texnologiyalarının əsas vasitə olduğunu bildirən R.Əliquliyev, institutun strateji əhəmiyyətli İKT layihələrində iştirak etdiyini və bu sahədə elmi tutumlu məsələlərin həllini öz üzərinə götürdüyünü qeyd edib.
Fondun nümayəndəsi informasiya proqramlarının qurulmasında əsas prinsiplər haqqında məlumat verdi. Bu prinsiplərin əsasını şəffaflığın genişləndirilməsi, məhkəmə proseslərinin xarici təsirlər olmadan keçirilməsi, müəssisə və təşkilatlar arasında rəqabət mühitində qiymətlərin aşağı salınması, söz azadlığı təşkil edir.
