Azərbaycan, Bakı/ Trend müxbir S.Babayeva/ Azərbaycanda rəqəmli teleyayıma keçidlə bağlı proqramın son variantı təsdiq olunmaq üçün Nazirlər Kabinetinə təqdim olunub. Bu barədə çərşənbə axşamı rabitə və informasiya texnologiyaları nazirliyindən bildirilib.
Hazırlanmış proqram üç mərhələdən ibarətdir: birincisi - 2007-2010-cu illər, ikincisi - 2011-2013-cü illər, üçüncüsü - 2014-2015-ci illər.
İlk növbədə Bakı, Gəncə və Naxçıvanda hər birində 4 kanal olan 2 paket, digər regionlarda isə bir paket istifadəyə veriləcək. Bunun nəticəsində əhalinin 60-70 faizi rəqəmli yayım zonasına qoşulacaq.
İkinci mərhələdə Bakı, Gəncə və Naxçıvanda daha bir paket istifadəyə veriləcək. Ümumilikdə 2013-cü ilə qədər 12 proqramlı 3 paketin istiafadəyə verilməsi planlaşdırılır.
Üçüncü mərhələdə isə əlavə ötürücülərin quraşdırılması ilə yayımın keyfiyyətinin yaxşılaşdırılması planlaşdırılır.
Analoq rəqəmli teleyayıma keçid Azərbaycanın Beynəlxalq Telekommunikasiya birliyi qarşısında götürdüyü öhdəliklərdən biridir.
Nazirlikdə hesab edirlər ki, Azərbaycanda rəqəmli teleyayıma keçid mütləq hesab olunur.
Azərbaycanda ilk dəfə rəqəmli yayım sistemi pilot layihə kimi 10 oktyabr 2004-cü ildə tətbiq olunub.
Layihənin maliyyələşdirilməsi dövlət hesabına həyata keçiriləcək.
