Gürcüstan, Tbilisi, 17 mart / Trend , müxbir N.Kirtsxaliya /
NATO Gürcüstan Silahlı Qüvvələrinin tədris prosesinin təkmilləşdirilməsinə kömək edəcək. Gürcüstan Müdafiə Nazirliyinin məlumatına görə, bu məqsədlə ilk dəfə Şimali Atlantika Alyansının 15 nəfərdən ibarət ekspert qrupu Gürcüstandadır.
NATO nümayəndə heyəti Birləşmiş Qərargahın rəhbər şəxsləri ilə görüşüb və gürcü ordusundakı tədris prosesi ilə tanış olub.
Bu gün isə xarici hərbçilər Milli Müdafiə Akademiyasına gələrək dərs proqramı ilə maraqlanıblar.
Ekspert qrupu martın 17-də həmçinin Krtsanis tədris mərkəzinə baş çəkəcək və infrastrukturla, eləcə də hərbçilərin nəzəri və praktiki hazırlıq istiqamətilə tanış olacaq.
Ekspertlər Gürcüstanda daha iki gün qalacaq. Bu vaxt ərzində nümayəndə heyətinin üzvləri gürcü tərəfinə tədris prosesini NATO standartlarına uyğun aparılmasına imkan verəcək təkliflərini təqdim edəcəklər.
Martın 18-də Müdafiə Nazirliyində yekun görüşü olacaq. NATO ekspertləri müdafiə nazirinin birinci müavini Vladimir Çaçibaya, nazirin müavini Qiorqi Muçaidze və SQ Birləşmiş Qərargahının rəis müavini, briqada generalı David Nairaşvili ilə görüşəcəklər.
Məqalə müəllifi ilə əlaqə ünvanı: [email protected]
