Yaxın günlərdə Tehran BMT Təhlükəsizlik Şurasına üzv olan ölkələrə məktub göndərməyi planlaşdırır. Bu barədə İran XİN-in rəsmi nümayəndəsi Ramin Mehmanpərəst bildirib. Məlumatı FARS informasiya agentliyi yayıb.
İranın xarici işlər naziri Mənuçöhr Müttəkinin adından göndəriləcək məktubun məzmunu iyunun 9-da BMT TŞ-nin qəbul etdiyi yeni sanksiya ilə bağlı tənqiddən ibarət olacaq.
Yeni sanksiya İranın öz nüvə proqramını dayandırması məqsədilə qəbul edilib. BMT TŞ-nin 12 üzvü 1929 saylı qətnamənin qəbul edilməsi lehinə, təşkilatın iki qeyri-daimi üzvü olan Türkiyə və Braziliya əleyhinə səs verib, Livan isə bitərəf qalıb.