Bazar ertəsi Tehranda İranın bir neçə turizm şirkəti ilə Misirin turizim şirkətləri arasında əməkdaşlıq sazişi imzalanıb. Bunu İran- Misir Ticarət Şurasının sədri Muhyəddin Əl-Qəndur deyib. Bu barədə Trend İranın FARS xəbər agentliyinə istinadən məlumat verir.
Əl-Qəndur bildirib ki, İranın Ticarət və Sənaye Palatasında imzalanmış sazişə əsasən, hər ay 10 000 iranlı Misirə və ildə 60 000 misirli İrana səyahət edəcək. O əlavə edib ki, İran və Misirin səfirləri təyin olunan kimi sazişin icrasına başlanacaq.
MEHR agentliyi ötən gün İran XİN_dəki mənbəyə istinadən məlumat verib ki, İran yaxın 6 ay ərzində Misirə səfirini təyin edəcək. Ötən həftə İran "Press TV" kanalı xəbər verib ki, İranın və Misirin xarici işlər nazirləri Əli Əkbər Salehi və Nabil əl-Ərəbi arasındakı danışıqlardan sonra İran Misirə yeni səfir təyin edib. İranın Xarici İşlər Nazirliyinin sözçüsü Ramin Mehmanpərəst isə bu məlumatın düzgün olmadığını bildirib.
İranla Misir arasında münasibətlər 1978-ci ildə, Misir İsraillə Kemp-Devid sülh sazişini imzalayandan və Qahirə devrilmiş İran şahı Məhəmməd Rza Pəhləviyə sığınacaq təklif edəndən sonra pozulub. İki dövlət arasında münasibətlər Misirdə Hüsnü Mübarək rejiminin devrilməsindən sonra istiləşməyə başlayıb.