Azərbaycan, Bakı, 16 avqust /Trend, müxbir A.Tağıyev/
Baş nazir Rəcəb Tayyib Ərdoğanın Türkiyənin terrorizmlə mübarizə tədbirlərini gücləndirməyə hazırlaşdığı barədə bəyanatı kürdyönümlü Sülh və Demokratiya Partiyasına (SDP) qarşı yönəlib və Türkiyə hakimiyyətinin kürd separatçılarına güzəştə getməyəcəyini göstərir. Türkiyə kəşfiyyatının keçmiş analitiki Mahir Kaynak belə hesab edir.
"Türkiyə Baş nazirinin həmin kifayət qədər sərt bəyanatı hökumətin kürd separatçılarına münasibətdə dəqiq mövqeyini aşkara çıxarır. Bu, bir növ separatçıların şantaj yolu ilə öz məqsədlərinə çatmağa nail olmayacaqlarına dair səsləndirilən ismarıcdır", - Kaynak bildirib.
Bu yaxınlarda Ərdoğan bəyan edib ki, Türkiyə terrorizmlə mübarizənin yeni mərhələsinə başlayır. O, vəd edib ki, müsəlmanların müqəddəs Ramazan ayı başa çatan kimi Türkiyə hakimiyyəti terrorizmlə mübarizə aparmaq üçün yeni, daha dəqiq plan hazırlayacaq.
"Bizim səbrimiz son həddə çatıb. Ramazan ayından sonra konkret tədbirlər görüləcək", - Ərdoğan qeyd edib.
Kaynak hesab edir ki, Baş nazirin bu bəyanatı Türkiyədə terrorizmlə bağlı getdikcə gərginləşən vəziyyət fonunda səsləndirilib və şübhəsiz ki, o, öz müsbət bəhrəsini verəcək.
Analitikin sözlərinə görə, terrorizmlə mübarizənin başlıca sahələri logistika işləri və kəşfiyyat fəaliyyəti olmalıdır.
"Terrorizmlə mübarizənin planlaşdırılan mərhələsi səmərəli olacaq. Türkiyə hakimiyyəti bu məsələyə kifayət qədər qətiyyətli köklənib", - Kaynak deyib.
İyulda ölkənin cənub-şərqindəki Diyarbəkir əyalətində terrorçu Kürd Fəhlə Partiyasının (PKK) yaraqlıları ilə jandarmeriya arasında baş verən toqquşmalar nəticəsində türk ordusunun 13 hərbiçisi həlak olub, yeddisi yaralanıb.
Türkiyə ordusunda son dövrün ən iri itkiləri haqqında məlumatlar əldə etdikdən dərhal sonra hökumət rəhbəri Ərdoğan Ankarada Baş Qərargah və xüsusi xidmət orqanları rəhbərləri ilə təcili müşavirə keçirib. Müşavirədə qəbul edilən tədbirlər haqqında məlumat verilmir.
Bundan əvvəl PKK Türkiyə hakimiyyətini çoxillik kürd probleminin həlli ilə bağlı konkret addımlar atılmayacağı təqdirdə silahlı qarşıdurmaların fəallaşacağı ilə hədələyirdi.
Türkiyə iə PKK arasında münaqişə 25 ildən artıqdır davam edir. Bu münaqişə 40 mindən artıq insanın həyatına son qoyub. PKK BMT, eləcə də Ankaranın tamhüquqlu üzv kimi daxil olmağa çalışdığı Aİ tərəfindən terror təşkilatı kimi tanınıb.