Azərbaycan, Bakı, 9 mart /Trend, müxbirlər S.İsayev, E.Tariverdiyeva/
Bu yaxınlarda xərçəngin müalicəsi üçün işlənib hazırlanmış NOSH qaz aspirini İranda da istehsal oluna bilər. Bu barədə Trend-ə Nyu-Yorkun Tibb Kollecinin kimya professoru Xosrov Kəşfi bildirib.
"Bu preparatın tərkibi mürəkkəb deyil və mən onun İranda da istehsal oluna biləcəyinə əminəm. Əlbəttə, preparat əvvəlcə kliniki sınaqdan keçirilməlidir", - o deyib.
Bu yaxınlarda Kəşfi və onun komandası adi aspirinin xərçəng əleyhinə qabiliyyətini kəskin şəkildə artıra biləcək NOSH - qaz aspirini ixtira ediblər.
Yeni aspirin xərçənglə mübarizə şanslarını artırır və hətta adi aspirinin gündəlik qəbulu zamanı müşahidə olunan ziyanlı əlavə təsirini azalda bilir. Bədxassəli şişlərlə mübarizədə ənənəvi aspirinin effektivliyi bir qədər əvvəl sübut olunub. Lakin o da xora və bağırsaqda qanaxmaya səbəb ola bilər.
Əldə olunan yeni preparat isə nəinki nisbətən daha ziyansız damar genəldicisidir, o həm də süd və mədəaltı vəzlərin, yoğun bağırsağın, ağ ciyərlərin xərçənginin və leykemiyanın bəzi növləri zamanı xərçəng hüceyrələrinin inkişafını ləngidir. Bu, laboratoriya testləri ilə təsdiq olunmaqla yanaşı, həm də aydın olub ki, NOSH qaz aspirini xərçəng hüceyrələri ilə mübarizədə adi aspirindən yüz min dəfə daha effektivdir.
Yeni preparatın testdən keçirilməsi üçün Kəşfinin komandası insanda 11 tip şiş hüceyrələrinin, o cümlədən yoğun bağırsaq, mədəaltı vəz, süd vəzisi, ağ ciyər və prostat vəzin şişlərini sınaqdan keçirib.
Alimin sözlərinə görə, heyvan üçün də ziyanlı olmayan yeni dərman siçanlarda bağırsaqda heç bir fəsad törətmədən şişin ölçüsünü 85 faiz azaldıb.
Kəşfinin sözlərinə görə, qarşıda preparatın 2 ildən 5 ilə kimi vaxt tələb olunacaq kliniki sınaqları durur.
"Növbəti addım toksikoloji tədqiqat olacaq, daha sonra biz kliniki sınaqlara başlayacağımıza ümid edirik", - o deyib.