Azərbaycan, Bakı, 18 iyul /Trend/
Ermənistanda elektrik enerjisi tariflərinin artırılması ilə əlaqədar ölkə əhalisinin sosial vəziyyətinin pisləşəcəyi gözlənilir. Trend-in məlumatına görə, bu barədə "news.am" saytı "İrates de facto" qəzetinə istinadən xəbər yayıb.
Qəzetdə qeyd olunub ki, artımın avqustun 1-dən baş verəcəyinə baxmayaraq, son iki həftə ərzində ölkədəki mağazalarda bəzi malların qiymətləri artıq iki dəfə bahalaşıb: "Eləcə də söhbət yerli mallardan gedir. Bu hal gözlənilməz deyil. Bundan əlavə, xüsusilə avqustun 1-dən sonra bütün yerli istehsal məhsullarının qiymətlərinin artacağını gözləmək olar. Yəni, çörəyin, yumurtanın, süd məhsullarının və digər ilkin tələbat mallarının, texniki və başqa məhsulların qiymətləri bahalaşacaq. Bu isə o deməkdir ki, yaxın vaxtlarda, daha dəqiq qış dövründə əhalinin sosial vəziyyəti xeyli pisləşəcək".
Qeyd edək ki, Ermənistanın İctimai xidmətlərin tənzimləməsi komissiyası iyulun 1-də keçirilən iclasında elektrik enerjisi tariflərinin artırılması haqqında qərar qəbul edib. Qərara görə, avqustun 1-dən ölkədə elektrik enerjisi tarifləri 10 faiz artırılacaq.