Azərbaycan, Bakı, 4 fevral /Trend, müxbir Rufiz Hafizoğlu/
Türkiyə Fransaya terrorçu təşkilatlarla, o cümlədən "İslam dövləti" qruplaşması ilə əlaqəli olan 40-dan artıq vətəndaşı deportasiya edib. Trend-in "Anadolu" agentliyinə istinadən verdiyi məlumata görə, bu barədə Türkiyənin Fransadakı səfiri Haqqı Akil bildirib.
Onun sözlərinə görə, deportasiya olunanların bəziləri Türkiyənin regionlarında, eləcə də ölkənin hava limanlarında saxlanılıb.
Səfir qeyd edib ki, hazırda Türkiyə terrorla mübarizə üçün mümkün olan hər şeyi edir.
Bir müddət əvvəl Türkiyə polisinin ölkənin aeroportlarında gücləndirilmiş iş rejiminə keçdiyinə dair məlumatlar yayılmışdı.