Bakı. Trend:
İstanbulda bir həftə ərzində keçirilən narkotik üzrə əməliyyatlarda saxlanılan 128 şübhəlidən 79-u həbs edilib.
Trend bu barədə Türkiyə KİV-ə istinadən xəbər verir.
İstanbul Polis İdarəsinin Narkotik Cinayətlərilə Mübarizə Şöbəsi əməkdaşları, təxminən 6 ay davam edən texniki və fiziki müşahidədən sonra Esenyurt, Çatalca, Küçükçekmece, Bahçelievler, Bakırköy ve Güngören rayonlarında əməliyyatlar həyata keçirib.
1-7 oktyabr tarixləri arasında keçirilən əməliyyatlarda narkotik istehsalı ilə məşğul olan, onun ticarətini aparan və küçələrdə satan 128 şübhəli saxlanılıb.
Əməliyyatlar zamanı 130 kq kokain, 265 kq sintetik narkotik, 2 milyon 202 min narkotik həbi və narkotik istehsalında istifadə olunan maddələr ələ keçirilib.
Polis idarəsindəki prosedurlardan sonra Respublika Prokurorluğuna təqdim olunan şübhəlilərdən 79-u həbs edilib, 49-u isə məhkəmə nəzarəti şərti ilə azadlığa buraxılıb.