Bakı. Trend:
Honkonqda fərdi ev qiymətləri ardıcıl altıncı ayda da artaraq noyabr ayında aylıq müqayisədə 0,9 faiz yüksəlib.
Trend xarici KİV-ə istinadla xəbər verir ki, bu barədə şəhərin Reytinq və Qiymətləndirmə Departamentinin məlumatında qeyd olunub.
Məlumata görə, oktyabr ayı ilə müqayisədə ev qiymətlərindəki artım əvvəlki ayın yenidən baxılmış 0,4 faizlik artımından sonra baş verib. 2024-cü il ərzində ümumi qiymət artımı 2,8 faiz təşkil edib və bu, 2021-ci ildən bəri davam edən illik azalmaya son qoyub.
Artım faiz dərəcələrinin endirilməsi və fond bazarındakı müsbət əhval-ruhiyyə ilə əlaqələndirilir. Bununla belə, Hong Kongda ev qiymətləri hələ də 2021-ci ildəki zirvə səviyyəsindən təxminən 30 faiz aşağıdır. Buna səbəb kimi yüksək ipoteka faizləri, zəif iqtisadi perspektiv və Covid-19 məhdudiyyətləri ilə milli təhlükəsizlik qanunlarının təsiri ilə ölkəni tərk edənlərin yaratdığı zəif tələb göstərilir.