Azərbaycan, Bakı, 18 noyabr /Trend, müxbir Ş.Cavadsoy/
Rejissor, prodüser və təşkilatçı kimi fəaliyyətini Türkiyənin İstanbul şəhərində davam etdirən Sərxan Kərəmoğlu bir sıra dünya şöhrətli simalarla yaradıcılıq əməkdaşlığı qurması ilə fərqlənməyə müvəffəq olur. Sərxan Trend-ə həm bu vaxta qədər gördüyü işlərdən, həm də yaxın gələcəkdə reallaşdıracağı layihələrdən danışdı.
"Təşkilatçı insan, ilk növbədə, çalışmalıdır ki, onun işinə etibar edənlərin sayı çox olsun. Allaha min şükür, mən illərdir ki, bu etibarı qazanmışam. Türkiyə, Rusiya, Dağıstan Muxtar Respublikasında neçə-neçə mötəbər tədbirlər olur ki, onları reallaşdırmaq mənə həvalə olunur. Sonuncu dəfə belə bir təbdir Rusiyada keçirildi. Dünya şöhrətli simalar - Hollivud ulduzları Jan Klod Vandam, Hillari Suonk, illüziyaçı Jan Rauven, Ukraynanın xalq artisti Ruslana, tanınmış ukraynalı ulduz Sofiya Rataro, Avropada skripka kraliçası kimi tanınan Venessa və başqaları ilə bir arada olmaq çox qürurverici idi. Tədbirdə aparıcılıq missiyası mənə həvalə olunmuşdu. Sözügedən ulduzlarla eyni səhnəni bölüşməklə bir daha sübut etdim ki, öz işimin ustasıyam. Təvazökarlıqdan uzaq səslənsə də, bu belədir. Bilirəm, indi deyəcəyim sözlərə görə yenə Azərbaycan şou-biznesində kimlərsə əlinə daş alıb məni qınamağa başlayacaq, amma fakt öz faktlığını qoruyur ki, bizdə iş bilən və ya möhtəşəm layihə yaratmaq əzmində olan insanlar çox azdır. İnşallah, istəyirəm ki, mən qürbətdə yox, doğma vətənimdə də irihəcmli layihələr həyata keçirim", - Sərxan belə dedi.
