Azərbaycan, Bakı, 25 dekabr /Trend/
Dekabrın 26-sı saat 19:00-da "Yay" qalereyasında rəssam və illüstrator İrina Eldarovanın "Qızlar neftçilərə üstünlük verir" adlı sərgisinin açılışı olacaq.
Trend-in məlumatına görə, müəllif 60-cı illər kinosu və Merelin Monronun unudulmaz obrazından ilhamlandığı rəsm və instalyasiyaları seyrçilərə təqdim edəcək.
YARAT Müasir İncəsənət Məkanı tərəfindən təşkil edilən sərgi 26 fevral 2014-cü ilə qədər davam edəcək.
İrina Eldarova - rəssam, Repin adına Sankt-Peterburq Dövlət Akademiyasının (1975-1979) və Boris Deksterevin kursunda təhsil aldığı Moskvadakı V.İ.Surikov adına Dövlət İnstitutunun (1980-1982) məzunudur.
Onun bədii yaradıcılığı özündə yalnız rəsm və qrafikanı deyil, eləcə də Azərbaycan, Rusiya, Qazaxıstan və Özbəkistanda irimiqyaslı nəşriyyat layihələrinin işlənib hazırlanmasını birləşdirir.
2007-ci ildə rəssam Qazaxıstan Jurnalistlər Birliyi Tərəfindən təqdim edilən Ən Yaxşı Media Layihəsi mükafatına layiq görülüb.
İrina Eldarova Bakıdakı Xalqlar Dostluğu metro stansiyasında quraşdırılmış monumental mərmər pannonun müəllifidir.
Rəssamın peşəkar maraqlarının dairəsi fotoşəkil, videoart və jurnalistikanı əhatə edir.
İrina Eldarova Paris şəhərində yerləşən Azərbaycanın Mədəniyyət Mərkəzində Heydər Əliyev Fondu tərəfindən təşkil edilən HOME - SWEET HOME ("Ev - Doğma Ev") sərgisində iştirak edib.
İrina Eldarova London, Paris,Roma və sair şəhərlərində keçirilmiş "Fly To Baku" sərgisində də iştirak edib.
Rəssam 2012-ci ildə Böyük Britaniyada böyük uğurla qarşılanan və incəsənət tənqidçilərinin ən müsbət rəylərini qazanan "A Proud Violin" ("Məğrur skripka") uşaq kitabının illüstratoru olub.
