Bakı. Trend:
Oğlumla şəhid olmamışdan bir gün öncə danışdım. Danışıqlarımızda hər hansı bir problemin olduğunu deməmişdi.
Trend-in məlumatına görə, bunu şəhid Orxan Əsgərovun dəfn mərasimində atası Rizvan Əsgərov deyib.
O bildirib ki, oğlunun arzuları böyük idi.
"Orxan böyük Türk dünyası uğrunda çalışırdı. Çox vətəncanlı idi, övladlarını da bu ruhda yetişdirirdi. Bundan sonra çalışacağıq ki, onun yarımçıq qalan arzularını biz yerinə yetirək", - atası vurğulayıb.
Qeyd edək ki, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə terror hücumu olub. Hücum edən şəxs avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıblar. Hazırda hadisənin istintaqı aparılır.