Azərbaycan, Bakı, 31 may/ Trend , müxbir İ.Əlizadə/ Azərbaycanın Qərb bölgəsində yerləşən Ağdam və Bərdə rayonlarının hüquq-mühafizə orqanları Qarabağ Azadlıq Təşkilatının açıq havada qurultay keçirməsinə imkan verməyib. "Ağdam və Bərdə rayonlarının hüquq mühafizə orqanları Bərdənin girəcəyndə qarşımızı kəsib, bizə rayon ərazisinə daxil olmağa imkan vermirlər", -deyə şənbə günü Trend -a açıqlamasında Qarabağ Azadlıq Təşkilatının (QAT) sədri Akif Nağı bildirib.
QAT şənbə günü Qarabağ bölgəsinin Ağdam və ya Bərdə rayonlarından birinin ərazisində, açıq havada qurultay keçirməyi planlaşdırırdı. Qurultayın açıq havada keçirilməsi Ağdam və Bərdə rayon icra hakimiyyətlərinin tədbir üçün yer ayırmaması ilə bağlı idi. Qurultayın gündəliyində təşkilat sədrinin hesabatının dinlənilməsi, sədr və rəhbərliyin yenidən seçilməsi məsələləri daxildir.
QAT Qarabağın erməni işğalçılarından azad olunması üçün ictimai mübarizəni təşkil etmək məqsədilə 2000-ci ildə Bakıda yaradılıb. Qurumun rəhbəri tarix elmləri namizədi, dosent Akif Nağıdır. Təşkilat öz sıralarında, Azərbaycanın tanınmış ziyalıları, qaçqın və məcburi köçkünləri, gənclər, keçmiş döyüşçülər, ehtiyatda olan yüksək rütbəli zabitlər olmaqla, 10 min nəfəri birləşdirir. QAT-ın Azərbaycan üzrə 74 yerli şöbəsi və müxtəlif xarici ölkələrdə təmsilçiləri fəaliyyət göstərir.
"Hazırda yüzlərlə qurultay nümayəndəsi Bərdə postunda saxlanılıb. Bura Bərdə və Ağdam rayonlarının polis rəisləri gəliblər. Onlarla danışıqlar heç bir nəticə vermir. Bizə bildiriblər ki, Ağdam və Bərdə rayonlarının ərazisində qurultay keçirməyə imkan verilməyəcək. Bizi, güc tətbiq etməklə, Bərdə rayonunun ərazisindən çıxardılar",- deyə təşkilat rəhbəri əlavə edib.
Onun sözlərinə görə, Beyləqan və Tərtər rayonlarından qurultaya gələnləri də polis Ağdam və Bərdə rayonlarına buraxmayıb.
Nağı əlavə edib ki, təşkilat rəhbərliyi müzakirələr apardıqdan sonra, qurultayın necə keçirilməsi haqda qərar verəcək.
Məqalə müəllifi ilə əlaqə ünvanı: [email protected]
