Azərbaycan, Bakı, 11 noyabr / Trend müxbir S. Kazımlı / Bakının Qaradağ rayonunda tikinti şirkətlərinin birinin keçmiş əməkdaşının evindən xeyli miqdarda pul və qızıl-zinət əşyaları oğurlanıb. Bu barədə Qaradağ rayon Polis İdarəsindən çərşənbə axşamı Trend -a məlumat verilib.
Məlumata görə, bir neçə gün əvvəl rayonun Sahil qəsəbəsinin sakini Aydın Zeynalovun evindən 8 min manat pul və qızıl - zinət əşyaları oğurlanıb. İlkin araşdırma zamanı oğurluq edən şəxsin evə eyvandan daxil olması müəyyənləşib.
RPİ - dən bildiriblər ki, Zeynalov əvvələr Rusiyada aparılan tikinti işləri ilə bağlı ora işçi qüvvəsi aparmaq üçün fəaliyyət göstərən şirkətlərin birində işləyib. "Zərərçəkmişin vaxtilə işlədiyi həmin şirkət azərbaycanlilardan ibarət briqadalar yaradaraq, Rusiyaya işləməyə aparırmış,"- deyə polis idarəsindən əlavə ediblər.
Hazırda oğurluq edən şəxsin müəyyən edilib, tutulması üçün polis əməkdaşları tərəfindən əməliyyat -axtarış tədbirləri həyata keçirilir.
Faktla bağlı Qaradağ RPİ - də Azərbaycan Cinayət Məcəlləsinin yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla oğurluq törədilməsi (177.2.3 - cü) və xeyli miqdarda ziyan vurmaqla oğurluq törədilməsi (177.2.4 - cü) maddələri ilə cinayət işləri başlanılıb, istintaq aparılır.
Məqalə müəllifi ilə əlaqə ünvanı:[email protected]