Azərbaycan, Bakı, 12 noyabr / Trend , müxbir S. Kazımlı / Bakının Binəqədi rayonunda ötən gecə qətl hadisəsi baş verib. Hadisənin şəxsi münasibətlər zəminində baş verdiyi bildirilir.
Bu barədə Binəqədi rayon Prokurorluğundan çərşənbə günü Trend -a məlumat verilib.
Məlumata görə, noyabrın 11-də saat 21:00 radələrində Biləcəri qəsəbəsində 1968-ci il təvəllüdlü Rasim Şahbaz oğlu Əmrahov mübahisə zəminində qeyri-rəsmi yaşadığı 1983-cü il təvəllüdlü Madonna Qəhri qızı Sadıxovaya bıçaqla 3 zərbə vurub. Aldığı xəsarətlər nəticəsində Sadıxova paytaxt xəstəxanalarından birinə yerləşdirilsə də, həkimlər onun həyatını xilas edə bilməyiblər. O, xəstəxanada ölüb.
Binəqədi rayon Polis İdarəsinin 6-cı bölmə əməkdaşlarının keçirdikləri əməliyyat tədbirləri nəticəsində Əmrahov tutulub. Əmrahovun meyvə-tərəvəz mağazasında satıcı işlədiyi bildirilir.
Faktla bağlı Binəqədi rayon Prokurorluğunda Azərbaycan Cinayət Məcəlləsinin qəsdən adam öldürmə, yəni digər şəxsi qəsdən həyatdan məhrum etmə (120.1-ci) maddəsi ilə cinayət işi başlanılıb, istintaq aparılır.
Məqalə müəllifi ilə əlaqə ünvanı:[email protected]
