Azərbaycan, Bərdə, 17 noyabr / Trend , müxbir Ş.Cəliloğlu / Azərbaycan-Ermənistan qoşunlarının təmas xəttində mülki şəxs minaya düşüb.
Azərbaycanın cənub-qərbində yerləşən Tərtərin (paytaxt Baküdan 360 km məsafədə) Qapanlı kəndi yaxınlığında kənd sakini, 1987-ci il təvəllüdlü Qurbanov Abdulla Novruz oğlu piyadalar əleyhinə minaya düşərək ağır bədən xəsarətləri alıb.
Hadisə Qurbanov atını əkin sahəsindən gətirərkən baş verib. Yaralı ağır vəziyyətdə Tərtər rayon mərkəzi xəstəxanasına çatdırılıb. Xəstənin vəziyyəti ağır olduğundan Bakıya göndərilib.
Trend -un arayışı: Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb,1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
Məqalə müəllifi ilə əlaqə ünvanı: [email protected]
