Azərbaycan, Bakı, 6 iyul /Trend/
Çərşənbə axşamı gecə Kabildən təxminən 50 kilometr şimalda qəzaya uğrayan Azərbaycanın "Silk Way Airlines" aviaşirkətinin yük təyyarəsinin hissələri Pərvan əyalətinin Siyah Gərd rayonunda aşkar edilib. Bu barədə RİA Novosti Əfqanıstan telekanalına istinadən məlumat verib.
Əyalət administrasiyası nümayəndələrinin məlumatına görə, təyyarə təxminən yerli vaxtla saat 22:30-da qəzaya uğrayıb və demək olar ki, tamamilə yanan təyyarə təxminən 10-20 hissəyə parçalanıb. Polis təyyarənin dağa çırpılaraq düşdüyü rayonda hələlik kimə məxsus olduğunu söyləmək mümkün olmayan yanmış əl-ayaq aşkar edib.
Əfqanıstan telekanalının məlumatına görə, təyyarə Əfqanıstanda Beynəlxalq Təhlükəsizliyə Yardım Qüvvələri (ISAF) üçün yanacaq yükü ilə uçurdu.