Azərbaycan, Bakı, 25 oktyabr /Trend, müxbir A.Tağıyeva/
Türkiyənin Van əyalətində yenidən zəlzələ olub. Trend-in CNN Turk telekanalına istinadən yaydığı məlumata görə, yerli vaxtla 17:55-də baş verən zəlzələ 5,4 bal gücündə olub.
Van əyalətində baş vermiş zəlzələ nəticəsində ölənlərin sayı 432 nəfərə çatıb. 1300-dən çox insanın yaralandığı bildirilir. Trend-in məlumatına görə, bu barədə Türkiyənin "Sabah" qəzeti yazır. Ölənlərin sayının 1000 nəfərə çatacağı ehtimal olunur.
Oktyabrın 23-də Bakı vaxtı ilə saat 15:41-də episentri Van şəhərindən 42 km şimalda olmaqla 7,2 bal gücündə zəlzələ baş verib. Yeraltı təkanlar Diyarbəkir, Batman, Şırnak, Muş, Ərzurum, Bingöl, Bitlis, Siirt, Mardin şəhərlərində də hiss edilib. Dağıntıların olduğu və eyni zamanda dağıntılar altında insanların qaldığı bildirilir.
Azərbaycan Milli Elmlər Akademiyası Respublika Seysmoloji Xidmət Mərkəzinin verdiyi məlumata əsasən, zəlzələ Azərbaycan Respublikası Naxçıvan MR-in Sədərək, Şərur, Babək rayonlarında, eləcə də Naxçıvan şəhərində 3.5-3.0 bal gücündə hiss edilib. Azərbaycan ərazisində dağıntılar yoxdur.