Bakının təhlükəli piyadaları (VİDEO)

Azərbaycan, Bakı, 25 aprel /Trend, müxbir E.Mehdiyev/

Bakıda yol hərəkəti qaydalarını pozan piyadalar həm öz, həm də sürücülərin həyatlarını təhlükə altına salırlar.

Trend-in təqdim etdiyi videogörüntülər zamanı məlum olur ki, piyada işıqforun qırmızı işığından keçərkən ağır yol qəzası baş verir.

Bakı şəhər Dövlət Yol Polisi İdarəsinin bölmə rəisi Vaqif Əsədov çərşənbə günü Trend-ə bildirib ki, bu görüntülər "Təhlükəsiz Şəhər" sisteminin kameraları vasitəsilə qeydə alınıb.

Qeyd edək ki, Azərbaycanda "Piyadalar, diqqətli olun!" şərti adı altında aprelin 23-dən 30-dək təhlükəsizlik həftəliyinə başlanıb. Piyadalar tərəfindən yol hərəkəti qaydalarının pozulmasına görə cərimənin məbləği 10 manatdır.

Xatırladaq ki, statistik məlumatlara əsasən, cari ilin ilk 3 ayı ərzində respublikada piyadaların vurulması ilə bağlı qeydə alınmış hadisələr ümumilikdə ölkədə baş verən yol-nəqliyyat hadisələrinin 40 faizini, Bakı şəhərində isə 55,2 faizini təşkil edir.