Azərbaycan, Bakı, 22 yanvar / Trend , müxbir İ.Əlizadə/ Dağlığ Qarabağ münaqişəsi İslam Konfransı Təşkilatı Parlament İttifaqının sessiyasında müzakirə olunacaq. "Dağlığ Qarabağ münaqişəsi İslam Konfransı təşkilatı Parlament İttifaqının gündəliyinə daxil edilib və müzakirə olunacaq. Müzakirələrin sonunda İKT Pİ Dağlığ Qarabağ münaqişəsi ilə bağlı Qətnamə qəbul edəcək", - deyə, çərşənbə axşamı Trend ə açıqlamasında Azərbaycanın İKT Pİ nümayəndə heyətinin rəhbəri, millət vəkili Gövhər Baxşəliyeva bildirib.
Baxşəliyeva qeyd edib ki, sessiyada Dağlığ Qarabağ münaqişəsi ilə bağlı məruzə ilə çıxış edəcək: "Dağlığ Qarabağın islam sivilizasiyasını əks etdirən torpaqların Azərbaycan ərazisi olduğunu, ermənilər tərəfindən işğal edildiyini sessiya iştirakçılarının nəzərinə çatdıracaq. Eyni zamanda, Ermənistan tərəfindən işğal edilən həmin ərazilərdə mövcud olan mədəni- tarixi abidələrin, məscidlərin dağıldığını, nəzarətsiz ərazilərdə narkotik, silah qaçaqmalçılığının mövcudluğunu, radioaktiv maddələrin basdırıldığını iclas iştirakçılarının diqqətinə çatdıracaq".
İKT Parlament İttifaqının sessiyası yanvarın 27-dən 31-dək Misirin paytaxtı Qahirədə keçiriləcək.
Azərbaycanı sessiyada deputatlar-- Gövhər Baxşəliyeva, Sabir Rüstəmxanlı və Xanhüseyn Kazımlı təmsil edəcəklər.
Sessiyada Fələstin, İraq, Sudanın Darfur bölgəsindəki vəziyyət, Qüds və Fələstinin işğal olunmuş digər ərazilərinin azad edilməsi, BMT-nin Qətnamələri və beynəlxalq qanunlar vasitəsilə Fələstin xalqının hüquqlarının bərpasına çağırış, İsrail də daxil olmaqla, Yaxın Şərq bölgəsinin kütləvi qırğın və nüvə silahından azad edilməsi və İranın nüvə proqramı müzakirə olunacaq.
