Azərbaycan, Bakı, 11 aprel / Trend , müxbir İ.Əlizadə/ Milli Məclisin deputatları hesab edirlər ki, Dağlıq Qarabağ münaqişəsinin sülh yolu ilə həlli üçün Azərbaycan və Ermənistan arasında aparılan danışıqlarda yaranmış vəziyyət parlamentdə müzakirə olunmalıdır. "Hazırda danışıqlarda müəyyən dəyişikliklər müşahidə olunur. Ona görə də Dağlıq Qarabağ münaqişəsi ilə bağlı parlamentdə dinləmələrin keçirilməsi daha da aktuallaşıb və buna böyük ehtiyac var", - deyə cümə günü Trend a açıqlamasında Azərbaycan parlamentində müxalifəti təmsil edən Müsavat deputat qrupunun üzvü Pənah Hüseyn bildirib.
Ermənistan parlamentində Dağlıq Qarabağ münaqişəsi ilə bağlı dinləmələr keçirilib. Dinləmələrin sonunda qəbul olunan bəyanatda Dağlıq Qarabağın Azərbaycanın tərkibinə qaytarılmasının qeyri-mümkün olduğu göstərilib.
Hüseyn hesab edir ki, BMT Baş Assambleyasında "Azərbaycanın işğal olunmuş ərazilərində vəziyyətə dair" Qətnamənin qəbul olunması, azərbaycanlılara qarşı cinayətlər törətmiş terrorçu Serj Sərkisyanın Ermənistanda hakimiyyətə gəlməsi və onun verdiyi bəyanatlar, işğalçı ölkənin parlamentində keçirilən dinləmələr və bəyanatın qəbul olunması Dağlıq Qarabağ məsələsinin parlamentdə müzakirəyə çıxarılmasını zəruri edir.
"Dağlıq Qarabağ münaqişəsi bir dəfə parlamentdə müzakirə olunub. Parlamentdə növbəti müzakirələrin keçirilməsi mümkündür və bu ola bilər", - deyə hakim Yeni Azərbaycan Partiyası (YAP) Siyasi Şurasının və Azərbaycanın AŞPA-dakı nümayəndə heyətinin üzvü Aydın Mirzəzadə bildirib.
Mirzəzadə hesab edir ki, Ermənistan hakimiyyəti parlamentdə dinləmələr keçirməklə, ölkə daxilində yaranmış gərgin vəziyyətdən cəmiyyətin diqqətini yayındırmaq istəyir.
Deputat əlavə edib ki, Ermənistan hakimiyyəti yenə də Dağlıq Qarabağ kartından istifadə edir.
"Ermənistan parlamentdə dinləmlər təşkil edir. Azərbaycan prezidenti isə, Dağlıq Qarabağ münaqişəsinin həlli üçün ardıcıl siyasət həyata keçirir, ordu gücləndirilir, dövlət büdcəsi artırılır", - deyə Mirzəzadə əlavə edib.
Müxalifətyönlü Demokratik İslahatlar Partiyasının sədri, deputat Asim Mollazadə hesab edir ki, Dağlıq Qarabağ münaqişəsinin həlli üçün aparılan danışıqlarda irəliləyiş olarsa, parlamentdə dinləmələr keçirmək olar: "Parlamentdə ölkənin vacib problemləri ilə bağlı dinləmələrin keçirilməsi normal haldır və vacibdir".
"Dağlıq Qarabağ münaqişəsinin həlli ilə bağlı yaranmış vəziyyətin parlamentdə müzakirəsi mümkündür. Parlament millətin maraqlarına xidmət edir. Ona görə də, zərurət yaranarsa, Dağlıq Qarabağ münaqişəsi parlamentdə müzakirə olunacaq", - deyə Azərbaycanın AŞPA-dakı nümayəndə heyətinin sədr müavini, bitərəf millət vəkili Gültəkin Hacıyeva bildirib.
Müxalifətyönlü Ədalət Partiyasının sədri İlyas İsmayılov bildirib ki, Dağlıq Qarabağ münaqişəsi parlamentdə müzakirə olunmaqla yanaşı, bütün siyasi partiyalar və ictimai təşkilatlar məsələni daim diqqət mərkəzində saxlamalıdırlar.
"Ermənistan parlameneti dinləmələr keçirib. Hesab edirəm ki, ermənilərin hərəkətlərini təkrarlamaq lazım deyil. Dağlıq Qarabağ münaqişəsinin həlli üçün özümüz addımlar atmalıyıq".
Müxalifətyönlü Böyük Quruluş Partiyasının sədri Fazil Qzənfəroğlunun fikrincə, Azərbaycan cəmiyyətində Dağlıq Qarabağ münaqişəsinə biganə münasibətin mənbəyi parlamentdir: "Deputatlar dəfələrlə parlamentdə Dağlıq Qarabağ münaqişəsi ilə bağlı ən azı qapalı dinləmələrin keçirilməsi haqda məsələ qaldırıblar. Lakin bunun heç bir nətəcəsi olmayıb və dinləmələr təşkil edilməyib. Azərbaycan parlamenti Dağlıq Qarbağ münaqişəsi ilə bağlı son zamanlar bir-birinin ardınca baş verən proseslərə mütləq münasibət bildirməlidir".
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-93-cü illərdə isə, Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994 - cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
Məqalə müəllifi ilə əlaqə ünvanı: [email protected]