Azərbaycan, Bakı, 17 iyul / Trend , müxbir Y.Оstapenko /
"Azərbaycan və Ermənistan Dağlıq-Qarabağ münaqişəsinin həlli üçün nədəsə güzəştlərə getməlidirlər", - ATƏT-in baş katibi Mark Perrin de Brişambo hesab edir.
"Mən hesab edirəm ki, Azərbaycan və Ermənistan prezidentləri İlham Əliyev və Serj Sarkisyanın Moskvadakı bu gün və sabah keçiriləcək görüşləri çox vacib mərhələdir", - Brişambo cümə günü Bakıda, Azərbaycana səfərinin yekunları ilə bağlı mətbuat konfransında deyib.
İki ölkənin liderlərinin danışıqları bu gün və sabah Moskvada, Rusiya Prezidenti mükafatı uğrunda at yarışları zamanı qeyri-rəsmi görüş çərçivəsində keçiriləcək. Sabah danışıqlar Rusiya Prezidenti Dmitri Medvedyevin iştirakı ilə davam etdiriləcək.
İki Cənubi Qafqaz ölkəsi arasında münaqişə 1988-ci ildə Еrmənistanın Azərbaycana qarşı ərazi iddiası irəli sürməsi zəminində yaranıb. 1991-ci ilin dekabrında, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-1993-cü illərdə Şuşa, Xocalı və Dağlıq Qarabağa bitişik yeddi rayon işğal olunub. 1994-cü ilin mayında tərəflər atəşkəs rеjiminə dair razılaşma əldə еdiblər və о vaхtdan bəri, ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
ATƏT-in baş katibi "Böyük səkkizliy"in (G8) İtaliyanın Akvil şəhərində keçirilən sammiti zamanı ATƏT-in Minsk qrupu həmsədr ölkələrinin prezidentlərinin bəyanatına vacib əhəmiyyət verib. Onun sözlərinə görə, "sözügedən bəyanat bu məsələnin həllinin vacibliyini göstərir".
"Qeyd etmək lazımdır ki, ATƏT-in Minsk qrupunun həmsədrlərinin fəaliyyyətində çox güclü canlanma müşahidə olunur", - baş katib bildirib.
"Dünən Prezident İlham Əliyevlə görüş zamanı mən onun tərəfindən Dağlıq Qarabağ məsələsinin həlli prosesində irəliləyişə marağı gördüm. Ümid edirəm ki, bu münaqişə tezliklə həll olunacaq", - Brişambo deyib.
De Brişambo iyulun 15-dən Bakıda üçgünlük səfərdədir.
Məqalə müəllifi ilə əlaqə ünvanı: [email protected]