Azərbaycan, Bakı, 24 may /Trend, müxbir Y.Ostapenko/
Dağlıq Qarabağda "parlament seçkiləri"nin keçirilməsi münaqişənin sülh yolu ilə nizamlanması kontekstində Dağlıq Qarabağın yekun statusunun vaxtından qabaq təyin olunması kimi nəzərdə tutulmamalıdır. Bu barədə ATƏT-in Minsk qrupunun həmsədrlərinin bəyanatında deyilir.
Mayın 23-də separatçı rejim Dağlıq Qaqrabağda qondarma "parlament seçkiləri" keçirib. Bir çox beynəlxalq təşkilatlar, o cümlədən Avropa Şurası bu seçkiləri tanımadığı barədə bəyanat verib.
"Həmsədrlər anlayır ki, Dağlıq Qarabağ "hökuməti" "parlament seçkiləri" kimi demokratik bir prosedurun köməyi ilə ictimai həyatı təşkil etməyə çalışır", - bu barədə bəyanatda deyilir. - "Ancaq həmsədrlər bir daha qeyd edib ki, Dağlıq Qarabağ nə Minsk qrupunun həmsədrləri olan üç ölkədən biri, nə hansısa digər ölkə, o cümlədən Ermənistan tərəfindən müstəqil və suveren dövlət kimi tanınmayıb".
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.