Azərbaycan, Bakı, 29 iyul /Trend, müxbir E.İsmayılov/
Dağlıq Qarabağ münaqişəsinin həlli edilməsi və Azərbaycan torpaqlarının azad olunması Türkiyə üçün prinsip məsələsidir. Bunu Türkiyənin dövlət naziri Zəfər Çağlayan Bakıda keçirilən mətbuat konfransında deyib.
"Türkiyənin bu mövqeyi dəyişməz qalacaq", - o bildirib.
Türkiyəli nazir və iş adamlarından ibarət böyük nümayəndə heyəti Bakıya çərşənbə günü müxtəlif görüş və danışıqlar keçirmək üçün gəlib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.